Psa 53 | TUCO | STEP | Mbouŋ to David Yes kankanooŋa to lolodi imaagh pa Maaron, tigham ŋgar ila lolodi tighaze: “Maaron eta ineep maau.” Ndiran tovene, Maaron lolo padi maau kat. Pasa, ŋgar todi isami wa. Tauto tighamgham ŋgar samsamia naol. Eta igham ŋgar poia maau.

aMbo 10:4, 53:1+; Ro 3:10+

bMbnp 18:21

cMbnp 6:5; Ro 3:10+; Ep 2:3

dYems 5:4+

eMbo 53:6, 126:1

Psalms 53

Ndiran kankanooŋa to lolodi imaagh pa Maaron

Mbouŋ to David

1 Yes kankanooŋa to lolodi imaagh pa Maaron, tigham ŋgar ila lolodi tighaze: “Maaron eta ineep maau.”
Ndiran tovene, Maaron lolo padi maau kat. Pasa, ŋgar todi isami wa. Tauto tighamgham ŋgar samsamia naol.
Eta igham ŋgar poia maau. ^a
2 Maaron ineep izi sambam, ve mata izizi pa tamtoghon to taan.
Ye ighaze ighita: Todi eta pale ighilaala, ma maau? Ve eta izuaria tau leso iwatag Maaron? Maau. ^b

3 Tisob tipul muridi pani, ve tisami wa.
Eta igham ŋgar poia maau. Maau le maau kat. ^c
4 Tovenen Maaron igham ŋgar naol ighaze: “Yes to tinoknok ghamuuŋ ŋgar samsamia, ledi ghilalooŋ, ma maau? Ŋeez o ŋgar todi ivot?
Sawa isob, yes titombaan tamtoghon tiou, ve tipasob mbeb todi le isob kat, tinimale yes to tighan aniiŋ popoia le tipasobi.
Matadi iŋgal ghou ve tisuŋ payou maau.” ^d
5 Ndiran tovene irau tipatum di. Pasa muri, matughezaaŋ tiina kat pale igham di.
Muuŋ, timatughez tovene maau.
Eemoghon tipamundigin malmal payam, tauto Maaron pale irab di timatmaat, ve tuadi tizi tiwaghengheen izi taan.
Yam pale alib padi, ve mayadi. Pasa, Maaron ighur muri padi kat.
6 Oyai, Maaron to ineep izi ndug Zion, iuul yes Israela, ve ipas di tivot pa pataŋani todi, ghoro poia!
Ighaze Maaron iuul tamtoghon toni ve tineep poia muul, nene pale tinidi iza.
Onoon kat, Yakop papaghu toni pale lolodi poia le poia kat. ^e